Smart Phone ke garam, sust aur battery timing kam honay ki aik ahem wajah

Slow Smartphone

Agar aap ka Android phone sust hai aur bohat jald garam hojata hai ya is ki battery timing kam hai to yeh “Crypto Jacking” ki wajah se ho sakta hai. Yani kisi hacker ny aap ka phone hack kar liya hai aur usay cryptocurrency ki mining ke liye istemaal kar raha hai. Mining k doran paicheeda mathematical calculations ki jati hain or reward ke tor par calculation kerny wale ko cryptocurrency coins ya tokens milte hain.

Is amal ke douran achi khasi processing power darkaar hoti hai. Yeh processing power kisi aik smart phone ki processing power se bohat ziyada hoti hai. Crypto Jacking mein hacker bohat se Android smart phone ka control haasil kar ke un ki processing power ko marboot kar dete hain. Yeh sab Smart Phones mein virus zada Apps install kar ke kya jata hai.

Aik IT Security company ESET ke mohaqiqeen ka kehna hai ke Play Store se 1 million se 5 million ki tadaad mein download honay wali “Bug Swasher” game sarfeen ke ilm mein laaye baghair un ke phone ko cryptocurrency ki mining ke liye istemaal kar rahi hai. Hacking ki is terhan ki wardaton ko Crypto Jacking ka naam diya gaya hai.

Google Play Store par bohat si applications mein cryptocurrency mining program se jurey “Trojan Horse” chupaye ja rahay hain. July mein Google ny elaan kya tha ke woh Play Store par mojood tamam crypto mining applications par pabandi laga rahay hain. Lekin haqeeqat mein Google ko bhi nahi maloom ke kis application mein cryptocurrency mining ke liye trojan horse mojood hai. Ab chunkay cryptocurrency mining ke liye bohat ziyada processing power darkaar hoti hai, is liye aksar is ka assar mobile ke sust honay, garam honay ya battery timing kam honay ki soorat mein samnay aata hai. is se ziyada bura honay ki soorat mein poora handset hi mustaqil tor par buri terhan mutasir hota hai.

Is sorat-e-haal se bachney ke liye sarfeen ko apna mobile operating system dastyab taaza tareen version par up date karna chahiye. Is ke ilawa sarfeen ko Anti Virus program install karna chahay aur koi bhi application unofficial source se download kar ke install nahi karni chahay.

Leave a Reply

Your email address will not be published. Required fields are marked *