Gamers ke liye khushkhabri, 24000 game cheats par mushtamil database download karen

cheatbook database 2018

Koi bhi khail ho is mein khilari ko koi na koi chaal to laazmi chalna padtee hai. Aur jahan chaal ki baat aaye wahan dhoka dahi yani Game Cheat ko kaisay nazar andaaz kar satke hain. Khasosan PC ya Smart Phones par kheli jaaney wali games mein la-tadaad aisay codes, khufia rastay aur bugs waghera hotay hain jinhein istemaal kar ke aap koi bhi ghair-qanooni rasta ikhtiyar kiye baghair ba aasani khail ke douran anay wali rakawton ko paar kar satke hain ya phir aglay level tak pahonch satke hain.

Yeh Game Cheats ya khufia chaalein umooman game developers ki janib se hi tayyar ki jati hain taa ke game ko test kya jaye ya phir takneeki mahaarat rakhnay walay khilari un se lutaf-andoz ho saken.

Aisi hi aik mashhoor chaal “Konami Code” hai jis mein “Konami” ki tyar kerdah games ko khailtay hue khilari joystick ke buttons ko makhsoos tarteeb mein daba kar khailnay ke mazeed mawaqay haasil kar sakta tha.

Agar aap games ke junoon ki hadd taq dildada hain to aap ke liye khushy ki khabar yeh hai ke” Cheatbook Database” ke naam se Nintendo aur PlayStation 4 par kheli jaaney wali games ki 24000 se zayed chaalein yani Game Cheats dastyab hain. Aap is database se apni marzi ki game ko ba aasani talaash kar satke hain.

Is database mein sirf games ki khufia chaalein hi nahi di gayeen balkay un se mutaliqa tips aur tutorials bhi faraham kiye gay hain. Lekin yaad rahay aap in khufia chalon ko kisi kattar gamer ke sath khailtay hue mat aazmayen. Kyunkay aisay gamer Game Cheat ko sakht napasand karte hain.

Wazeh rahay ke yeh database aik freeware software hai jisay windows 95 se le kar windows 10 taq kisi bhi version par install kya ja sakta hai.

Leave a Reply

Your email address will not be published. Required fields are marked *